មនុស្ស២នាក់ស្លាប់យ៉ាងអណោចអធ័មខណៈជិះម៉ូតូត្រូវរថយន្ដបុកពេញមួយទំហឹង
27-August-2018 | ដោយ ពលមនសិការ
កណ្ដាល៖ រថយន្ដមួយគ្រឿងបើកដោយល្បឿនលឿនមិនប្រយ័ត្ន ជ្រុលទៅបុកម៉ូតូជិះច្រាស់ទិសគ្នាពេញមួយទំហឹង បណ្ដាលឲ្យមនុស្ស២នាក់ជាអ្នកជិះម៉ូតូស្លាប់យ៉ាងអណោចអធ័មនៅកន្លែងកើតហេតុ។ ករណីគ្រោះថ្នាក់ចរាចរណ៍ខាងលើនេះ បានកើតឡើង កាលពីវេលាម៉ោង២២និង៥០នាទី ថ្ងៃទី២៦ ខែសីហា ឆ្នាំ២០១៨ លើកំណាត់ផ្លូវជាតិលេខ៥ នៅចន្លោះគីឡូម៉ែត្រលេខ៣២-៣៣ ស្ថិតក្នុងភូមិពោធិតូច ឃុំកំពង់លួង ស្រុកពញាឮ ខេត្តកណ្ដាល ។
មន្ដ្រីនគរបាលចរាចរណ៍ស្រុកពញាឮបានឲ្យដឹងថា ជនរងគ្រោះស្លាប់មានគ្នា២នាក់ ទី១-ឈ្មោះ ប៉ិម ចន្ថា ភេទប្រុស អាយុ២៥ឆ្នាំ ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្ដាល1J-5371 និងទី២-ឈ្មោះ ចាប គឹមហេង អាយុ១៨ឆ្នាំ (ជាអ្នករួមដំណើរ)។ ជនរងគ្រោះទាំង២នាក់មានទីលំនៅភូមិធ្យូង ឃុំវិហារលួង ស្រុកពញាឮ ខេត្តកណ្ដាល ។ ចំណែកឯរថយន្ដម៉ាក TOYOTA SlENNA ពណ៌ស ពាក់ស្លាកលេខ ភ្នំពេញ2K-3323 បើកបរដោយជនមិនស្គាល់អត្តសញ្ញាណ រត់គេចខ្លួន ។
ប្រភពដដែលបន្ដថា នៅមុនពេលកើតហេតុ សាក្សីបានឃើញរថយន្ដ TOYOTA SlENNA បើកបរតាមបណ្ដោយផ្លូវជាតិលេខ៥ ក្នុងទិសដៅពីត្បូងទៅជើង លុះជិះមកដល់ចំណុចកើតហេតុ ក៏បានរេចង្កូតជ្រុលទៅបុកជាមួយនឹងម៉ូតូមួយគ្រឿងជិះក្នុងទិសដៅច្រាស់គ្នាចំពីមុខពេញមួយទំហឹង បណ្ដាលឲ្យជនរងគ្រោះទាំង២នាក់ស្លាប់ភ្លាមៗនៅកន្លែងកើតហេតុ រីអ្នកបើករថយន្ដបានទុករថយន្ដរបស់ខ្លួនចោល រួចរត់គេចខ្លួនបាត់ស្រមោល។
ក្រោយពីមានហេតុការណ៍កើតឡើង សមត្ថកិច្ចជំនាញចរាចរណ៍ស្រុក បានចុះទៅដលើកន្លែងកើតហេតុ រួចធ្វើការវាស់វែងនិងកសាងឯកសារដកហូតមធ្យោបាយពាក់ព័ន្ធទាំង២គ្រឿង យកមកអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។ចំពោះសាកសពជនរងគ្រោះទាំង២នាក់ត្រូវបានសមត្ថកិច្ចជំនាញប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ3151
- ម្សិលមិញ16391
- សប្តាហ៍នេះ49381
- ខែនេះ164531
- ឆ្នាំនេះ164531
- សរុប20606987